OEKUSI, 14 Abríl 2025 (TATOLI)– Diresaun Rejionál Infraestrutura (DRI), Rejiaun Administrativa Espesiál Oekusi Ambeno (RAEOA), orienta empreza Tom’s Building Unipesoál Lda, normaliza ona estrada alternativa Sikone hodi liga komunidade ho transporte sira husi suku Bobokase bá suku Kutete.
Diretór Diresaun Rejionál Infraestrutura (DRI), Remigío Nuno Sila, hateten estrada ne’e kotu kuaze fulan-rua ona, labele halo normaliza tanba estatutu rai halai husi okos, nune’e difikulta movimentu transporte ho komunidade sira atu asesu ba merkadu.
Notísia relevante:Dalan alternativa husi suku Bobokase liga bá Kutete kotu
“Maibé foin daudaun kompañia Tom’s Building, nia mak sei implementa projetu emerjénsia, husi Kutete bá iha Leolbatan, entaun prezudika nia atu transporta nia ekipamentu ho materiál sira to’o fatin konstrusaun, nune’e DRI orienta ba kompañia referidu, bele apoia hadi’a ona estrada ne’ebé antes ne’e kotu totál, tan ne’e, husi parte DRI hato’o agradese ba kompañia, tanba bele halo ona normalizasaun, agora transporte sira bele liu ona ho séguru,” Remigío Nuno Sila, ba jornalista sira iha Oekusi, ohin.
Bazea observasaun husi DRI katak mezmu empreza Tom’s Building, halo ona normalizasaun, maibé nafatin rai halai, maibé transporte sira hanesan karreta no motorizada kontinua ultrapasa hela.
“Ami haree no nota katak, sei buka dalan komunika ho parte jeolojia sira, atu estuda kona-ba rai ne’e, tanba defisíl tebes ita atu rezolve ho projetu emerjénsia, maibé tauk mak ita seidauk hala’o estudu viabilidade, bele fó impaktu no estraga aan nafatin, ne’ebé sei fó tempu ba tékniku sira, atubele haree ba estatutu rai ne’e, bele loke fali dalan ou ho lia-na’in sira atu realiza seremónia rituál,” nia dehan.
Abitante husi suku Bobokase, Deonisio de Deus, hato’o agradese ba Autoridade RAEOA liuhusi servisu Diresaun Rejionál Infraestrutura, tanba bele koopera ho empreza Tom’s Building hodi halo ona normalizasaun.
“Ami kuaze atu fulan tolu ona, labele liu husi estrada ne’e tanba kotu ho razaun rai mak halai, entaun difikulta movimentu ema no trasporte husi Kutete no husi Kutete tun mai atu ba vila mós ladún di’ak, maibé ami agradese tanba kompañia bele hadi’a ona,” nia orgullu.
Rekorda fali katak, iha 2023 estrada rurál ne’e hetan reabilitasaun husi empreza lokál Lifau Indah Unip, Lda, ho valór kontratu $2,623,959.80, orsamentu ne’e Autoridade prevee husi Orsamentu Jerál Estadu (OJE) 2022.
Distánsia ba reabilitasaun estrada rurál ne’e, hahú husi suku Bobokase liga ba bairru Kutete, aldeia Mahata, suku Costa ho distánsia kilómetru 14, estrada ne’e nia medida metru-lima, kompleta ho valeta, ponte boot ida no ponte ki’ik hamutuk 10 no morru kontensaun.
Notísia relevante:Estrada kotu, difikulta komunidade Kutete lori produtu lokál ba merkadu
Abitante Naimeko ho voluntáriu aterru estrada kuak
Jornalista: Abílio Elo Nini
Editór: Florencio Miranda Ximenes
