OEKUSI, 14 Abríl 2025 (TATOLI) – Ministériu Solidariedade Sosiál no Inkluzaun (MSSI), segunda ohin, apoia nesesidade bázika ba família kbiit laek no Ema ho Defisiénsia (EhD) hamutuk 200 iha aldeia Cabana, Oélnanoe, Fuabano iha suku Suni-Ufe, sub-rejiaun Nítibe, Rejiaun Administrativa Espesiál Oekusi Ambeno (RAEOA).
Ministra MSSI, Veronica Das Dorres, relata apoia umantária ne’e ba kbiit la’ek no Ema ho Defisiénsia, nune’e bele tulun sira atu sustenta nesesidade uma-laran, tanba laiha ona forsa naton atu servisu maka’as hodi buka ai-han ba nesesidade moris.
Notísia relevante:MSSI sei apoia ai-han ba ema ho defisiénsia 582 iha Oé-Cusse
Ho apoia ne’e, Governante fó hanoin ba benefisiáriu 200 ne’ebé simu nesesidade bázika atu uza ba nesesidade família no labele kontinua faan no fahe tan ba ema seluk.
“Ami mai lori ai-han sira-ne’e, tanba kooperasaun servisu hamutuk ho autoridade RAEOA, ami la servisu mesak ita tenke servisu hamutuk ho unidade, atividade ne’e, la’os atu halo kampañia, maibé ne’e atividadade sosiál tanba ha’u-nia servisu ne’e kona-ba sosiál atu apoia imi, tanba imi laiha ona forma atu servisu maka’as, ne’ebé ohin fó ba imi, atu han labale faan tan ka fó ba ema seluk, ne’e sasán Governu nian atu fó ba imi,” Ministra MSSI, ko’alia iha aldeia Kabana.
Governante ne’e, informa, atividade ne’e, realiza tanba atu ezekuta misaun sosiál nian, ne’ebé fó kompeténsia ba MSSI atu tau matan ba família vulneravél sira iha nivél suku no aldeia.
“Ha’u mai iha ne’e, lori Estadu nia programa mak atu haree ba família vulneravél, nesesidade hirak-ne’e povu nian, la’os ami-nian, tanba polítika Governu nian tenki oferese ba imi, ohin ha’u mai to’o imi-nia fatin, Governu mós halo ona estrada rur’al, ohin ha’u mai haree husi dalan atu sae mai ne’e, estarda di’ak ona, tanba ne’e mak Governu hakarak atu kria kondisaun ba imi, ne’ebé atividade apoia nesesidade bázika la’os iha Oekusi de’it, maibé ba territóriu tomak,” nia dehan.
Notísia relevante:MSSI prepara foos saka rihun-51 ba grupu vulnerável iha tinan ne’e
Iha biban ne’e, Xefe suku Suni-Ufe, Crisanto Tamele, agradese ba Governu liuliu MSSI tanba bele hili Suni-Ufe sai alvu atu oferese ai-han ba kbiit laek no Ema ho Defisiénsia sira.
“Ha’u nu’udar Autoridade lokál, agradese ba Governu liuliu ministériu MSSI, bele identifika suku Suni-Ufe atu mai apoia nesesidade bázika, ami husu ba oin bele kontinua fó tan apoia, tanba ohin sira 200 ne’e balu la konsege mai tanba la’o labele, ne’ebé ami espera iha futuru bele kontinua tau matan nafatin basira,”
Entretantu, antes ne’e ha loron sabadu 12 Abríl 2025, Ministra MSSI mós nesesidade bázika família kbiit laek no Ema ho Defisiénsia iha suku Naimeko sub-rejiaun Pante, sei kontinua ba sub-rejiaun Pássabe no sub-rejiaun Oésilo iha loron tersa ne’e, 15 Abríl 2025.
Nesesidade bázika ne’ebé oferese ba kbiit laek no Ema ho Defisiénsia (EhD) mak hanesan, foos, minya-goreng, susu, biskuit, masin-midar no kafé inklui nesesidade seluk tan.
Notísia relevante:MSSI oferese ai-han nutritivu ba pasiente lepra iha RAEOA
Jornalista: Abílio Elo Nini
Editór: Florencio Miranda Ximenes
