BOBONARU, 15 Abríl 2025 (TATOLI)—Polísia Nasionál Timor-Leste (PNTL), Komandu Munisípiu Bobonaru hamutuk ho Falintíl Forsa Defeza Timor-Leste (F-FDTL) destakamentu postu Tunubibi husu ba komunidade hotu iha suku 50, postu administrativu neen (6) atu festeza loron paskua ne’ebé nakonu ho ambiente dame tuir fiar katóliku nia.
Notísia Relevante: PNTL Bobonaru prosesa kazu krime 313 iha 2024
Pozisaun ne’e hato’o husi Komandante Komandu Munisípiu Polisía Bobonaru, Superintendente Xefe Agostinho Gomes da Silva, hafoin halo enkontru koordenasaun ho Komandante Eskuadra Postu Administrativu neen (6), Batallaun Orden Públika (BOP) kompañia Delta Maliana Unidade Patrulamentu Fronteira (UPF) kampañia Alfa Munisípiu Bobonaru no komandante F-FDTL destakamentu Postu Tunubibi kona-ba seguransa ba selebrasaun festa paskua 2025.
Nia hateten, PNTL ho F-FDTL mós sei la tolera grupu ka individu ne’ebé tenta kria-instabilidade durante selebrasaun festa paskua.
“Ha’u-nia mensajen ba komunidade liu-liu joventude sira atu komporta-aan didi’ak, ho dixiplina tuir situasaun paskua nian. Signifika katak, ita tenke hakmatek, ita iha situasaun ne’ebé pás nia-laran, tuir tradisaun ema Katólika nian. Ne’ebé, la presiza barullu, tenke hakmatek duni, nune’e hotu-hotu kontribui ba dame, estabilidade no seguransa durante festa paskua iha ita-nia territóriu,” Nia hateten iha Kuartél Komandu Munisípiu PNTL Bobonaru, tersa ne’e.
Superintendente Xefe Agostinho Gomes da Silva, konfirma efetivamente PNTL halo ona seguransa iha semana kotuk misa Domingu Ramos nian no sei kontinua koloka membru sira ba iha dioseze Maliana, parokia, estasaun no kapela ne’ebé eziste iha munisípiu Bobonaru hodi garante festa paskua remata ho sesesu no hakmatek.
Nia dehan, bazeia ba planu operasaun ne’ebé trasa tiha ona katak membru BOP no F-FDTL sei halo movimentu iha área sira-ne’ebé nesesariu no parte UPF sei kontinua mantein seguransa iha liña Fronteira.
“Ami prontu garante situasaun hakmatek ba komunidade hotu iha munisípiu Bobonaru,” Agustino hakotu
Notísia Relevante: MI husu PNTL Bobonaru tane didi’ak povu nia konfiansa
Jornalista : Sergio da Cruz
Editór : Cancio Ximenes
