BOBONARU, 22 Abril 2025 (TATOLI)-Prezidente Konferénsia Episkopál Timorense (CET, sigla portugés), Don Norberto do Amaral, manifesta sentimentu pézames ba Papa Francisco nia falesimentu.
“Sentidu kondolénsia ba ita, Santu Padre nia mate ida-ne’e hodi fila ba Aman Maromak nia kadunan Santu, ita reza ba Maromak atu naroman haraik bensaun ba nia no perdaun ba nia sala hotu nia halo”, atuál Bispu Dioseze Maliana hatete ba jornalista sira iha Kámara Eklesiástika Dioseze Maliana, tersa ne’e.
Bispu hatutan: “Papa ema ida ne’ebé simples, haraik-an teb-tebes ho ninia liafuan sira ne’ebé simples, ema hotu-hotu komprende, hakuak ema hotu. Ninia solidariedade ema hotu iha mundu tomak, nia luta ba pás, nia laran hakmatek ho buat seluseluk ne’ebé nia halo, ita lakon boot”.
Ho sentimentu triste, Don Norberto husu ba sarani hotu atu kontinua reza ba Papa Francisco nia klamar.
“Husu ba sarani sira hotu atu mai partisipa misa, atu nune’e ita bele manifesta ita-nia sentimentu pézames ho Santu Padre hodi husu Aman Maromak nia bensaun no nia tulun ba nia-atan ne’ebé nia bolu ba hamutuk ho Nia”, katak Don Norberto.
Dioseze Maliana sei selebra misa ba falesimentu Papa Francisco iha Igreja Pro-Katedrál Maliana inklui parokia sira iha loron kinta, 24 Abríl, tuku 10.00.
Instituisaun Estadu iha Munisípiu Bobonaru hasa’e bandeira meia-haste hodi presta omenajen ba Santu Padre Papa Francisco.
Notísia Relevante: Papa Francisco sei haloot iha Bazílika Santa Maria Maggiore tuir nia legadu espirituál
Dom Norberto haktuir vizita Santu Padre mai Timor-Leste iha fulan-Setembru 2025 durante loron tolu hametin sarani sira nia fiar ho kbiit ne’ebé Papa husik liuhusi ninia prezensa.
Notisia Relevante: Vatikanu fó sai kauza Papa Francisco hakotu iis
Jornalista : Sergio da Cruz
Editora : Rita Almeida
