OEKUSI, 22 Abríl 2025 (TATOLI) – Sarani sira iha kapela São Fransisco de Assis Mahata, iha suku Kutete, sub-rejiaun Pante Makasar, Rejiaun Administrativa Espesiál Oekusi Ambeno (RAEOA), tersa ne’e, hasa’e orasaun ba falesimentu Papa Francisco iha Vátikanu.
Katekista Kapela São Francisco de Assis Mahata, Maria de Fátima Ena, espresa nia sentimentu triste ba jornalista sira hafoin remata orasaun, katak orasaun ne’e hodi hasa’e ba Aman Maromak, nune’e Amu Papa Francisco bele hetan grasa Maromak nian iha reinu lalehan.
Maria de Fàtima Ena. Foto Tatoli, I.P/Abílio Elo Nini
Notísia relevante:PNTL garante seguransa durante Lutu Nasionál ba falesimentu Papa Francisco
“Ha’u sente triste, tan ne’e ohin ami organiza malu ho sarani sira atu mai sunu lilin hodi reza ba Amu Papa, nune’e hetan grasa Maromak nian iha reinu lelahan. Ami triste tanba lideransa Papa Francisco konsege mai to’o Timor-Leste,” Katekista ne’e hato’o ho triste iha kapela Mahata Oekusi, ohin.
Iha fatin hanesan, Sarani Katólika, Vitória da Costa Pereira, sente triste tanba ne’e hakbesik ba Maromak hodi hasa’e orasaun ba matebian Santu Padre Francisco.
“Ohin, ami reza tanba kapela ne’e mahein husi São Francisco, ami fiar katak Papa Francisco inspiradu mós husi São Francisco de Assis, nia ema rikeza ida, maibé husik hela nia riku atu serví duni ba bibi atan-sira, tanba ne’e mak ami hotu hanesan São Francisco de Assis nia oan, halibur malu iha kapela ne’e atu hasa’e ami-nia orasaun ba Maromak atu simu Amu Papa Francisco iha Nian kadunan Santu,” nia katak.
Notísia relevante:Papa Francisco sei haloot iha Bazílika Santa Maria Maggiore tuir nia legadu espirituál
Vitória da Costa Pereira. Foto Tatoli, I.P/Abílio Elo Nini
Alende ne’e, nia hato’o agradesimentu ba Amu Papa Francisco tanba konsege hala’o vizita pastorál mai to’o sarani sira iha Timor-Leste.
“Ami-nia esperansa iha tempu besik karik, uma-kreda bele hili fali Papa foun ida hanesan lideransa Papa matebian ne’e, nune’e bele kontinua hametin no haburas liutan fé sarani sira hotu iha mundu. Ami hakarak hato’o ami-nia agradese wa’in ba matebian tanba ho laran luak hakat mai to’o Timor-Leste,” sarani ne’e hatete ho mata-been.
Entretantu, tuir observasaun Jornalista Ajénsi TATOLI,I.P, nota katak daudaun ne’e parte igreja sei organiza malu ho sarani sira husi parókia haat hanesan Oésilo, Pássabe, Nítibe no Pante Makasar hodi konsentra hodi hala’o misa ofisiál ba falesimentu Papa Francisco.
Notísia relevante:Vatikanu fó sai kauza Papa Francisco hakotu iis
Jornalista: Abílio Elo Nini
Editóra: Florencio Miranda Ximenes
