BOBONARU, 07 Maiu 2025 (TATOLI)—Administradór Postu Administrativu (APA) Maliana, Munisípiu Bobonaru, Augusto Caetano, iha tempu badak sei hasai sirkulár ida hodi bandu komunidade atu kesi animál iha kampu Aviasaun Antigu KODIM suku Ritabou.
Notisia Relevante: Autoridade Bobonaro planeia koloka seguransa iha kampu aviasaun Ritabou
Nia hateten, antes ne’e iha mandatu administradór antigu sira hasai ona sirkulár maibé to’o agora haki’ak-na’in animál sira balun la kumpre hodi kontinua kesi animál livre áreadór kampu Aviasaun.
“Ha’u presiza hasa’i karta sirkulár ida entrega ba animál-na’in sira atu labele kesi-animál iha kampu aviasaun. Tanba, kampu ne’e ita asegura para aviaun atu mai foti ita-nia pasiente sira-ne’ebé moras grave ne’e, tenke rujuk urjente ba Dili,” Nia informa ba jornalista sira iha nia kna’ar fatin, kuarta ne’e.
Nia dehan, autoridade hasai sirkulár ne’e atu prevene no evita animál impede sirkulasaun aviaun atu tula pasiente husi Hospitál Referál Maliana hodi transporta ba Hospiál Nasionál Guido Valadares iha Dili.
Administradór ne’e husu ba haki’ak-na’in animál sira-ne’e atu labele kesi tan animál iha kampu aviasaun, maibé bainhira la kumpre regra ne’e mak Autoridade Postu Administrativu sei foti medida ida-ne’ebé forte no rigorozu tuir lei Ijene Orden Públiku.
“Ami ho autoridade lokál sira sei kontrola, komesa ohin ba oin, ha’u sei tun ba ho sabit para ba haree sé mak kesi karau iha ne’ebá, ha’u ko’a kotu kedas tali ne’e para hatene. Labele halo tan. Tuir lei ne’em espasu públiku labele kesi animál. Ita atu prepara tama no simu podér lokál entaun ita tenke halo asaun ne’e para hadi’ak ita-nia rai Maliana ne’ebé sai sentru ka fuan ba sidade Bobonaru. Se ita hakarak haki’ak animál muda ba do’ok,” nia hateten.
Tuir observasaun Agensía Tatoli iha terrenu nota katak, lutu ne’ebé Autoridade Munisipíu Bobonaru konstrui ho orsamentu Programa Mão de Obra Postu Administrativu (PMOPA) tinan 2023 ne’e mós barak mak hetan estragu no transporta hanesan motorizada ho karreta mós movimenta livre ba-mai.
Notisia Relevante: Komunidade labele husik animál iha kampu aviasaun Ritabou
Jornalista : Sergio da Cruz
Editór : Cancio Ximenes
