OEKUSI, 26 Juñu (TATOLI) – Autoridade Rejiaun Administrativa Espesiál Oekusi Ambeno (RAEOA), kinta ohin hala’o lansamentu hodi hahú prosesu pavimentasaun ásfaltika ba projetu estrada kilometru 17, hahú husi terminál Tono iha suku Cunha, sub-rejiaun Pante Makasar to’o suku Bobometo, sub-rejiaun Oésilo.
Biban ne’e, Prezidente Autoridade RAEOA, Rogério Tiago Lobato, rekomenda ba empreza Internasionál Waskita Karya, atu nahe álfaltika tenki garante kualidade, tanba estrada referidu importante atu fasilita moviementu ema no transporte sira asesu ba merkadu.
Notísia relevante:Rogério Lobato preokupa projetu estrada Tono ba Oésilo gasta millaun 33-resin
“Lansamentu ohin ne’e, ita tau ona alkatraun husi Tono ba Oésilo, ne’e eventu importante, tanba hatudu katak Governu preokupa ho povu nia moris, ho preokupasaun ne’e atu halo povu hotu moris di’ak no hasai povu husi izolamentu, ne’ebé ita nahe alkatraun husi Tono ba Oésilo. Tuir responsavél husi empreza Waskita Karya informa mai ha’u katak, sei lori tinan ida atu kompleta alkatraun ne’e, entaun saida mak ita husu importante halo estrada tenke kualidade di’ak hanesan mós iha estrada sira iha vila-laran,” Rogéio Lobato, ko’alia iha terminál Tono, Oékusi, ohin.
Iha fatin hanesan, Jestór empreza Waskita Karya Ikwan, promete sei kumre iha prosesu pavimentasaun tanba ekipamentgu preparadu no sei koordena ho parte tékniku husi Governu Timor-Leste, hanesan Diresaun Rejionál Infraestrutura no Ajénsia Dezenvolvimentu Nasionál, Institutu Públiku (ADN,I.P).
“Ami-nia ekipamentu prontu ona hahú husi tinan kotuk, ami iha ne’e ona inklui materiál sira ami prepara hotu ona, entaun ami tenke hein de’it prosesu iha terenu, ami sempre iha koordenasaun ho DRI no ADN atu nune’e ami bele mantein kualidade servisu hamutuk, ne’ebé tuir kalendáriu ne’ebé ami hatama horisehik, planu ne’e tenke remata iha fulan Agostu 2026, ba tinan ida nian,” nia promete.
Entretantu, kompañia Internasionál PT Waskita Karya, ezekuta projetu estrada nasionál ne’e sei hahú husi eis merkadu Tono, suku Cunha, sub-rejiaun Pante Makasar sei to’o fronteira Napan, suku Bobometo, sub-rejiaun Oésilo ho distánsia kilómetru 17.
Valór kontratua projetu ne’e hamutuk $33,915,000.00 orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun servisu durante tinan rua.
Notísia relevante:Autoridade RAEOA indemniza abitante afetadu na’in-58 iha Oésilo
Autoridade hala’o serimónia kulturál molok ezekuta estrada nasionál Tono ba Oésilo
Jornalista: Abílio Elo Nini
Editór: Florencio Miranda Ximenes
