OEKUSI, 28 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, hato’o parabéns ba Ajénsia Notísioza Timor-Leste, Institutu Públiku (TATOLI,I.P) ne’ebé komemora nia aniversáriu ba da-sia nu’udar, mídia Estatál iha Timor-Leste.
Tanba ne’e, Eis-Ministru Interiór ne’e, enkojara funsionáriu no jornalista sira atu kontinua serbisu ho profisionál hodi fó sai informasaun ho objetividade ba públiku.
“TATOLI nu’udar ajénsia informasaun ofisiál, tenke brani atu ko’alia lia-loos, mezmu dalaruma lia-loos ne’e, ema balun la simu. Importante mak ne’e, tenke ko’alia ho objetividade, labele inventa, kuandu haree ona situasaun ida, ita tenke hato’o ba ema hotu bele hatene, ita tenke hato’o ho loloos,” Rogério Lobato, dehan iha Oekusi.
Notísia relevante:Tatoli tenke hametin papél nu’udar fonte informasaun di’ak no edukadór ba sosiedade
Tuir nia observasaun, kona-ba públikasaun produtu TATOLI nian durante ne’e, hatudu rezultadu pozitivu tanba sempre haklaken duni situasaun iha Timor-Leste ba mundu atu akompaña.
“TATOLI, ne’e Ajénsia ida, ne’ebé ami rasik, ha’u ho Ramos Horta ho tan sel-seluk, ami buka iha tempu rezisténsia nian, ami tenke buka naran ida, hodi fó notísia ba mundu kona-ba Timor-Leste, ha’u hanoin lia ida tatoli ne’e, lia ida di’ak tebes atu sai ita-nia Ajénsia Nasionál Notísia Timor-Leste nian, ha’u kontenti ho TATOLI nia serbisu, labele dezanima, la’o nafatin ba oin dalaruma iha difikuldade, maibé ha’u-nia liafuan mak ne’e, ha’u enkoraja TATOLI atu la’o nafatin ba oin no fó notísia ho objetividade labele inventa notísia, buat ne’ebé sira hatene, hat’o notísia ba povu atu-bele akompaña realidade iha Timor-Leste nian,” nia rekorda.
Notísia relevante:KBRI fasilita formasaun Jornalizmu Dijitál ba instituisaun haat inklui Ajénsia TATOLI, I.P
Ajénsia Tatoli, I.P nu’udar ajénsia ofisiál estadu Timor-Leste nian. Ezisténsia ajénsia ne’e maihusi inisiativa Governu, liuliu Sekretaria Estadu Komunikasaun Sosiál (SEKOMS) iha Sestu Governu nia mandatu.
TATOLI nu’udar transformasaun hosi ETNA (East Timor News Agency) depois nakfila ba ANTIL (Ajénsia Notisioza Timor-Leste). Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udar embriaun ho naran ANTIL.
ANTIL lansa husi Primeiru-Ministru, Rui Maria de Araújo, iha loron 27 Jullu 2016. Iha Marsu 2017, Konsellu-Ministru aprova ANTIL sai Tatoli, nu’udar ajénsia ofisiál Estadu Timor-Leste nian no publika iha Jornál Repúblika. Tatoli ho nia estatutu rasik nu’udar Institutu Públiku (IP).
Objetivu primeiru estabelese Ajénsia Estadu Timor-Leste mak sai fonte informasaun ofisiál Estadu sira Timor-Leste ne’ebé iha kapasidade no kbiit elabora produtu informasaun no notísia ne’ebé nesesita husi públiku, utilizadór informasaun iha eskalaun nasionál, rejionál no internasionál.
Segundu implementadór mak nu’udar Konstituisaun ne’ebé sai devér Governu nian atu fornese informasaun kredivel ho mós sai direitu informasaun sosiedade Timor Leste ne’ebé garantidu husi artigu 40 no 41 iha Konstituisaun Timor-Leste nian.
Ajénsia TATOLI la’ós de’it sai produtora informasaun, maibé mós iha papél nu’udar “National information clearing house” (Uma-mahon ba fó-sai informasaun nasionál ho loloos): Iha tarefa fó klarifikasaun no informasaun serteza, halakon misinformasaun (informasaun sala) no dezinformasaun (informasaun ne’ebé kontradís ho verdade).
Jornalista: Abílio Elo Nini
Editór: Rafael Ximenes de A. Belo
