DILI, 05 Agostu 2025 (TATOLI) – Empreza Petrolífera Finder Energy (Operadór bloku PSC 19-11) husi Austrália asina akordu ho universidade privada rua hanesan, Universidade Dili (UNDIL) no Universidade Orientál Timor-Lorosa’e (UNITAL) hodi oferese programa bolsa estudu interna ba estudante na’in-ualu, ho prioridade ba estudante feto.
Diretór Ezekutivu empreza Petrolífera Finder Energy, Damon Neaves, informa katak programa bolsa estudu ne’e sira oferese liuhusi asina nota entendimentu ida ho estabelesimentu ensinu superiór sira hodi hasa’e kbiit estudante nian iha área rekursu minerál.
Finder Energy nu’udar empreza mina ne’ebé ninia kompromisu ba konteúdu lokál ida-ne’e atu fó bolsa ba estudante feto sira-ne’ebé foti kursu iha área siénsia exata, kursu matématika no enjiñária durante tinan ida.
“Kompañia sei selu osan própina eskola nian ba tinan ida no mós kada fulan benefisiária sira hetan fundus apoiu hodi sustenta sira-nia atividade eskola nian”, Diretór ezekutivu ne’e informa ba jornalista sira iha sala reuniaun UNDIL, ohin.
Tanba ne’e, tuir nia, empreza ne’e sei tau prioridade liu ba sidadaun timoroan ne’ebé eskola duni iha universidade referida no tenke ho jéneru feto no valór Índice Prestação Cumulativo (IPK, sigla portugés) 2,7 ba leten.
Notísia relevante:UNDIL no IPB hasa’e kualidade liuhusi investimentu rekursu umanu iha rai-li’ur
Dekanu Fakuldade Enjeñária UNDIL, Januário Bernardo, informa, atividade asina akordu ohin ne’e entre empreza Petrolífera Finder Energy ho universidade rua ne’e, ne’ebé hetan konfiansa husi Governu no fornese mós bolsa estudu ba estudante sira husi UNITAL no UNDIL, liuliu estudante feto sira.
“Sira-nia objetivu ne’e atu hasa’e tan koñesimentu ba alin-feto sira-ne’e, tanba hanesan ita hatene katak iha área enjeñária ne’e partisipasaun feto nian menus tebes, entaun liuhusi bolsa estudu ne’e bele motiva sira hodi kontinua foti kursu enjeñária”, Dekanu ne’e dehan.
Nia informa, bolsa estudu ne’e nia durasaun tinan-ida no estudante sira mós sei hetan osan bolsu nian husi kompañia, fiar katak Governu fó ona konfiansa ba empreza ne’e hodi halo perfurasaun mina iha timor, nune’e kontinua nafatin oferese bolsu estudu ba estudante sira iha tempu tuirmai.
Nune’e mós tuir Vise-reitór Asuntu Finansa UNITAL, Silvio Alves Belo, ohin, parseiru sira halibur hamutuk iha fatin ida-ne’e hodi asina akordu ba programa bolsa estudu ne’ebé liga liu ba área enjeñária, nune’e sei fó oportunidade ba estudante feto sira hodi envolve iha bolsa estudu ne’e.
“Bolsu estudu ne’e sira sei kontinua estudu iha interna rai-laran. Fiar katak ba oin ita bele servisu hamutuk di’ak liután”, Vise-Reitór UNITAL otimista.
Notísia relevante:Estudante UNITAL husu Governu envolve partisipasaun joven iha PEDN
Tanba ne’e nia afirma katak UNITAL preparadu ona kandidatu hamutuk na’in-ualu maibé sei halo selesaun hodi identifika nain-haat mak sei hetan oportunidade bolsa estudu ne’e.
Notísia relevante:FDCH prepara tán bolseiru 15 ba bolsa estudu méritu iha Portugál-Brazil
Jornalista: Alexandra da Costa
Editór: Rafael Ximenes de A. Belo
