Saúde Oekusi avalia atinjimentu PIS hodi hadi’a iha futuru

OEKUSI, 22  Agostu 2025 (TATOLI) – Servisu Saúde Rejiaun Administrativa Espesiál Oekusi Ambeno (RAEOA) hamutuk ho parseiru Department  of Foreign Affairs and Trade (DFAT) inklui servisu saúde munisipíu Dili no Ermera, hala’o avaliasaun ba kobertura no atinjimentu sira, hahú husi Janeiru to’o Juñu ba programa Kuidadu Saúde Primária (PIS) iha Rejiaun Administrativa Espesiál Oekusi Ambeno (RAEOA).

Notísia relevante:Janeiru to’o Maiu, Saúde Oekusi rejista inan isin-rua mate iha ospitál

Sekretáriu Rejionál ba Asuntu Saúde, Luís de Jesus Neno, hateten, avaliasaun ne’e importante parseiru DFAT Austrália liuhusi Partnership for Human Development Austrália (PHD) ne’ebé sempre apoia serbisu saúde Oekusi, Ermera no Dili.

Tan ne’e avaliasaun ne’e, atu haree kobertura atinjimentu, Kuidadu Saúde Primaria (PIS) iha Oekusi nian, hahú husi Janeiru mai to’o Juñu 2025, kada fulan neen halo enkontru atu haree fali atividade sira-ne’ebé implementa, liuliu Kuidadu Saúde Primaria ligadu ho apoia husi DFAT Austrália nian oinsá nia atinjimentu no lala’ok, benefísiu no problema ne’ebé mak enfrenta durante fulan neen nian,  atu ba oin bele hadi’a di’ak liután.

“Atividade sira-ne’ebé hetan suporta (apoia), hanesan saúde maternidade infantil, partu, mobile sisca, nutrisaun no mós programa kapasitasaun ba rekursu umanu, programa Tuberkuloze (TBC), imunizasaun, lepra, HIV-SIDA inklui atividade promosaun nian, ida-ne’e mak ita avalia sira-nia progresu – karik atinje ita-bele kontinua haforsa liután, karik la atinje entaun ita tenke hadi’a iha fulan neen tuirmai,” nia dehan iha Oekusi.

Notísia relevante:Servisu saúde Oekusi rejista kazu dengue hamutuk sia no na’in-ida lakon vida

Progresu di’ak

Iha biban ne’e, Diretór Serbisu Saúde Munisipíu Ermera, advokasia ne’e importante tanba alvu husi DFAT apoia mak Dili, Ermera no Oekusi; ba Ermera, programa sira-ne’ebé hala’o iha populasaun Ermera hanesan mós iha Oekusi, fokuliu ba saúde maternidade infantil, nutrisaun, imunizasaun, inklui moras hada’et no la hada’et.

“Ne’ebé, ha’u bele dehan, kada fulan ita halo revizaun, iha Ermera hatudu katak rezultadu progresu di’ak uitoan, maske seidauk to’o 100%, maibé kada fulan neen iha mudansa uitoan ona, la’os hanesan uluk. Ita agradese, tanba sei Governu mesak sei labele, maibé ho apoia ita-nia parsériu sira, bele hasa’e ita-nia atinjimentu, liu-liu save indikadór tolu importante hanesan saúde maternidade infantil, nutrisaun no mós imunizasaun,” nia orgullu.

Notísia relevante:Servisu Saúde Oé-Cusse rejista pasiente TBC 102 no hitu lakon vida

Entretantu, partisipa iha avaliasaun ne’e, profisionál saúde sira husi sub-rejiaun Oésilo, Pássabe, Nítibe inklui Pante, PRADET, Marie Stopes Timor-Leste no seluktan.

Jornalista: Abílio Elo Nini

Editór: Rafael Ximenes de A. Belo