OEKUSI, 18 Setembru 2025 (TATOLI) – Veteranu António da Conçeição ho naran kódigu (Mau Ki’ak Lifau), eleitu nu’udar Prezidente Konsellu Veteranu Rejiaun Administrativa Espesiál Oekusi Ambeno (RAEOA) ho mandatu tinan lima, hahú husi 2026 to’o 2030.
António da Conçeição, eleitu liuhusi konferénsia munisipál Konsellu kombatente Libertasaun Nasionál (CCLN), daruak ho tema “Hametin Unidade ba Dezenvolvimentu Nasionál”, ne’ebé hala’o salaun igreja Numbei, durante loron rua, hahú iha kuarta to’o kinta ne’e.
Notísia relevante:Jeferinu Sa’u eleitu nu’udar komisáriu CCLN reprezenta Oekusi ba nasionál
Iha konferénsia munisipál daruak ne’e, realiza ho eleisaun fahe pakote rua mak hanesan pakote A lidera husi Contancio nu’udar Prezidente Konsellu Veteranu, ho 
nia estrutura responsavel zona sub-rejiaun sira mak Andre La’o, Dementinho C. de Almeida no João Tabes.
Pakote B lidera António da Conçeição nu’udar Prezidente Konsellu Veteranu ho nia estrutura responsavel zona sub-rejiaun sira mak Cipriano da Cunha, Bernabas da Crus Abi no Domingos Marques.
Iha konferénsia daruak ne’e, veteranu Luís de Jesus Neno, nu’udar Prezidente Meza ho nia Vise-Prezidente Meza mak Domingos de Almeida no Sekretária meza mak Pedro Lelan inklui ekipa verifikasaun sira.
“Pakote B, reprezenta husi veteranu António da Conçeição mak hetan votu barakliu hamutuk 114, no pakote A hetan votu 71, votu nulu neen no votu Branku rua, ne’ebé rezultadu hatudu ona, katak pakote B mak eleitu nu’udar Prezidente Konsellu Veteranu Oekusi ho nia mandatu tinan lima,” anúnsia rezultadu votasaun husi Prezidente Meja Luís de Jesus Neno, ba audénsia sira iha salaun igreja Numbei, lorokraik ne’e.
Notísia relevante:Veteranu no kombatente na’in-146 submete karta kontestasaun ba KKLN Oekusi
Iha tempu rezisténsia, Mau Ki’ak Lifau, asume responsabilidade nu’udar Primeiru Vise Seketáriu sub-rejiaun Haksolok Oekusi, tanba ne’e, iha nia mandatu sei akumula entidade hotu, nune’e bele dignifika naran sakradu veteranu morin nafatin ba jerasaun sira.
“Ha’u-nia programa atu hala’o iha ha’u-nia mandatu ne’e, sei haree fila-fali dadus kombatente no veteranu sira-ne’ebé pendente tinan barak sei buka atu hadi’a, lista reklamasaun sira-ne’ebé agora seidauk rezolve, ami sei buka atu rezolve liu-liu martír sira, no sira-nia oan,” nia hato’o hafoin eleitu liuhusi konferénsia, hala’o iha salaun igreja Numbei, ohin.
“Ita sei esforsa atu rezolve atu bele hetan sira-nia direitu nu’udar rekoñesimentu husi Governu Timor-Leste,” nia promete.
Hafoin hetan konfiansa husi kogresista sira hamutuk 200-resin, António da Conçeição, kompromete ba públiku katak, iha mandatu tinan lima sei esforsa atu rezolve lista no reklamasaun tantu veteranu no kombatente ne’ebé pendente tinan barak ona seidauk rezolvidu.
“Ha’u promete sei promove relasaun di’ak ho Autoridade RAEOA hanesan Governu, ita tenke serbisu hamutuk, juventude rezisténsia sira, igreja no autoridade lokál, liu-liu ba iha programa ne’ebé liga ho konsellu veteranu. Ita mós tenke promove fatin istóriku sira, atu habelár istória sira-ne’e ba jerasaun sira tuirmai,” nia promete.
Notísia relevante:Sobrevivente no mártir Masakre Tumin seidauk simu pensaun
Entretantu, bazea ba livru 3-C Orsamentu Jerál Estadu (OJE) RAEOA nian, haktuir benefisiáriu ne’ebé hetan ona apoia osan Estadu iha RAEOA ba kombatente ka veteranu libertasaun nasionál ema na’in-363 no martires libertasaun nasionál ema na’in-223
Jornalista: Abílio Elo Nini
Editór: Rafael Ximenes de A. Belo
