OEKUSI, 14 Outubru 2025 (TATOLI) – Prezidente Autoridade Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, tersa ne’e, konfirma katak orsamentu ba konstrusaun Ró Haksolok la prevee iha orsamentu Fundu Espesiál Dezenvolvimentu (FED) Oekusi nian.
Tanba ne’e, Régio Salu konfirma asuntu ne’e, atu klarifika ba rekomendasaun husi Vise-Prezidente bankada FRETILIN Maria Angelina Rangel, katak orsamentu ba konstrusaun Ró Haksolok iha hela Fundu Espesiál Dezenvolvimentu (FED) RAEOA nian.
“Ha’u mai haree ona, laiha planu ida ba OJE 2025 ne’e atu tau tan osan ba Ró Haksolok. Dalaruma ne’e espresaun husi kontextu seluk, tanba uluk kedas autoridade sesante sira uza FED atu finansia kontrusaun ba Ró Haksolok no mós kapitaliza sosidade komersiál, maibé kona-ba OJE 2025 laiha akolasaun iha ne’ebá, katak atu finansia kontinuasaun finansiamentu ba konstrusaun ne’e laiha, tantu ne’e ha’u labele komentáriu kazu Ró Haksolok ne’e, tama ona iha nível seluk, ne’ebé daudaun la’o hela,” nia klarifika ba jornalista sira iha Oekusi, ohin.
Notísia relevante:FRETILIN ninia komentáriu ba Ró Haksolok, orsamentu iha hela Fundu Espesiál RAEOA
Antes ne’e, Pezidente Komisaun, Cedelízia Farria dos Santos, dehan, tuir fiskalizasaun Komisaun identifika irregularidade barak iha kazu Ró Haksolok. Nune’e, rekomenda Governu labele aloka tan ona orsamentu no husu ba MP atu tau-atensaun sériu aselera prosesu investigasaun.
Lembra katak Ró Haksolok inaugura iha loron 26 Maiu 2017 iha sidade Figueirra da Foz, Portugál no tuir informasaun sei to’o iha Outubru 2017, maibé tanba problema internál empreza ho sub-kontratór mak to’o agora ró seidauk to’o Timor-Leste.
Ró Haksolok ho kustu millaun €13,7, iha kapasidade atu tula ema na’in-377 no karreta hamutuk 15.
Notísia relevante:Komisaun C husu Ministériu Públiku tau atensaun sériu ba kazu Ró Haksolok
Enkuantu, prosesu konstrusaun ba ró, ninia kontratu asina iha 2014 entre Governu no empreza portugés no konstrusaun konsege paradu, maibé bainhira estabelese ZEESM, prosesu konstrusaun ró-ahí ne’e entrega ba autoridade RAEOA mak responsabiliza.
Desizaun hili estaleiru hosi V Governu Konstituisionál lidera husi Primeiru-Ministru, Xanana Gusmão, ne’ebé selebra kontratu ho Estaleiru Atlantic Eagle Ship Building, Lda iha 22 Setembru 2014.
RAEOA-ZESSM simu prosesu konstrusaun liuhusi transferénsia projetu no alokasaun orsamentu husi Governu sentrál ba autoridade hodi transfere podér no alokasaun verba ne’ebé akontese entre Governu no Estaleiru Atlantic Eagle Ship Building.
Atu garante tuir espesifikasaun no padraun téknika ba ferry Ró Haksolok no asegura katak bele hetan rejistu internasionál tuir rekizitu Governu Timor-Leste, mak RAEOA-ZEESM selebra kontratu supervizaun ba konstrusaun ferry ho institutu soldadura no kualidade (ISQ-sigla portugés) ne’ebé hanesan instituisaun ho esperiénsia liu tinan-50 ho konstrusaun ne’ebé kredensiál atu fiskaliza konstrusaun.
Notísia relevante:Komisaun C halo estudu komparativu no vizita ró Haksolok iha fulan ne’e
Jornalista: Abílio Elo Nini
Editór: Rafael Ximenes de A. Belo
