Bairru Bi-ele tenke prioriza infraestrutura bázika ho emerjénsia
OEKUSI, 17 Outubru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, konsidera bairru Bi-ele lokaliza iha suku Bene-Ufe sub-rejiaun Nítibe nu’udar fatin izoladu liu iha Oekusi, no presiza hetan atensaun husi Governu atu konstrui infraestrutura bázika ho urjénsia.
“Iha semana kotuk ha’u enkontru audénsia ho Ministra MSSI, hato’o rekomendasaun pertinente barak kona-ba bairru Bi-ele, entaun ami kontinua kedas koloka ekipa ida ba to’o fatin, atu haree, maibé rekomendasaun sira-ne’e tenke harii eskola iha ne’ebá, tenki rekruta profesór atu fó edukasaun ba oan sira, ami mós deside ona atu dada ahi no mós loke estrada, tanba iha ne’ebá la’os kestaun izoladu ba povu de’it maibé kestaun ba asesibilidade ba ita-nia serbisu patrolamentu seguránsa sira iha fronteira no hakbesik merkadu ba povu,” nia hato’o promesa ne’e ba jornalista sira iha Oekusi, foin lalais ne’e.
Notísia relevante:Uma-kain 77 iha Naktuka la asesu eletrisidade dezde ukun-aan
Nia hateten, hafoi simu rekomendasaun husi Ministra Solidariedade Sosiál no Inkluzaun iha semana kotuk, iha semana ne’e, kooredena kedas ho tékniku husi Diresaun Rejionál Infraesestrutura (DRI), atu dezloka ekipa IGEADI,I.P atu hahú uluk husi estrada no ahi.
“Ohin ami halo desizaun, no ekipa verifikasaun sei ba fali iha semana oin, antes fulan Outubru ramata, projetu emerjénsia ida tenki hahú ona, hodi nune’e loke estrada atu asesu ne’e labele la’o ain, tenki karreta to’o fatin, entaun Bi-ele alta prioridade tenki rezolve ona, liu-liu ahi no estrada sei tama ba projetu emerjénsia, tenki halo antes udan monu rai, ne’ebé ita sei dezloka uluk ekipa IGEADI atu hahú uluk ba estrada depois kontinua ba ahi,” nia promete.
Notísia relevante:Rogério Lobato sei komunika IGEADI,I.P atu loke estrada ba abitante Biele
Entretantu, antes ne’e, Jestór sub-rejiaun Nítibe, relata katak, dadus populasaun iha bairru Bi-ele hamutuk 87 komposta husi uma-kain 23, ho totál labarik iha bairru Bi-ele hamutuk na’in-25, mak la asesu edukasaun tantu Ensinu Pré-Eskolár (EPE) no ensiu báziku tanba laiha fasilidade eskola
Tanba bairru Bi-ele, lokaliza iha área suku Bene-Ufe, geografikamente do’ok mós husi suku viziñu Usitaku, entaun labarik sira labele asesu eskola ho razaun distánsia do’ok, bainhira atu asesu eskola tenki la’o ain kilometru 10 na laiha estrada atu mai to’o Eskola Bázika Filiál (EBF) Bítila.
Notísia relevante:Uma-kain 100-resin iha suku Bene-Ufe Nítibe seidauk asesu liña eletrisidade
Jornalista: Abílio Elo Nini
Editór: Rafael Ximenes de A. Belo
