OEKUSI, 19 Dezembru 2025 (TATOLI) – Ministériu Administrasaun Estatál (MAE) oferese motorizada haat ba suku foun Monemeko no Kutete iha Rejiaun Administrativa Espesiál Oekusi Ambeno (RAEOA) atu fasilita serbisu administrasaun públiku iha iha suku.
Notísia relevante:MAE apela ba xefe suku 18 iha Oé-Cusse uza motorizada tuir regra Estadu
Ministru Administrasaun Estatál, Tomas do Rosário Cabral, esplika, motorizada haat ne’e, entrega tanba suku 18 iha Oekusi maioria hetan ona, tanba ne’e suku foun rua ne’e foin eleitu iha 2024, nune’ e motorizada rua ne’e apoia ba de’it xefe suku no ofisiál administrasaun suku.
“Governu entrega motorizada haat ne’e, rua ba xefe suku na’in-rua no ofisiál administrasaun suku nian na’in-rua, la’ós ba sekretáriu suku, tanba sekretáriu suku, nia papél atu halo atendimentu inklui ajenda xefe suku nian, motorizada ne’e tenke viajén to’o aldeia ba buka populasaun sira,”nia hateten iha Oekusi, ohin.
Notísia relevante:PNDS Oekusi aprova projetu rua hodi implementa iha suku Monemeko no Kutete
Governante ne’e fó hanoin, motorizada ne’e simu ona, tenke utiliza ba nesesidade públiku, no tau matan ba manutensaun.
“Husu CAC no Parlamentu nasionál bainhira deputada sira tuun halo fiskalizasaun iha suku sira, presiza husu fasilidade Estadu nian mak ida-ne’e, tenke haree mós transporte sira hanesan motorizada iha kondisaun di’ak kala’e, uza tuir nesesidade suku nian kala’e,” nia apela.
Xefe suku Kutete, José António Bana, agradese ba Governu, no promete sei utiliza tuir nesesidade suku nian.
“Primeiru ami hato’o agradese ba Governu tanba ohin bele apoia ona motorizada ba mai mai hanesan suku foun, tanba durante ne’e ami eleitu kuaze tinan ida, ami uza de’it ami-nia motorizada. Ne’ebé, ami agradese ba apoia ne’e. Ami mós promete sei kuidadu sasán sira-ne’ebé Governu fó ba suku, hanesan ohin Ministru Administrasaun Estatál rekomenda, ida-ne’e ami sei kumpre tanba ne’e patrimóniu Estadu nian, tenke utiliza ho responsabilidade,” nia orgullu.
Notísia relevante:MAE pose xefe suku eleitu Kutete no Monemeko iha Oekusi
Jornalista: Abílio Elo Nini
Editór: Rafael Ximenes de A. Belo
