OEKUSI, 06 Marsu 2026 (TATOLI) – Ministru Ensinu Superiór Siénsia no Kultura (MESSK), José Honório da Costa Pereira Jerónimo, rekomenda Universidade da Paz (UNPAZ) atu hadi’a atividade akadémika ba klase paralela iha Rejiaun Administrativa Espesiál Oekusi Ambeno (RAEOA).
“Ha’u-nia vizita ne’e, obrigasaun husi Primeiru-Ministru atu mai haree, realidade iha estudante no profesór, maibé ha’u husu nafatin, se imi hakarak sai ba nível polu hanesan DIT nian; tenke esforsa, iha laboratóriu, biblioteka, rai tenke iha. Profesór sira tenke mestradu mak hanorin lisensiatura,” Ministru hateten iha ámbitu enkontru ofisiál ho estrutrura UNPAZ no estudante sira iha Oekusi.
“Ha’u husu, kontinua hadi’a, klase paralelu ne’e la’o nafatin, maibé tenke oferese siénsia ne’ebé di’ak no loos ba ita-nia estudante sira, tanba ha’u rona, estudante sira selu aas uitoan, maibé profesór sira mós tenke iha obrigasaun atu hanorin ba ita-nia joven sira ho loos, tanba futuru sira mak sei lori nasaun ne’e ba oin,” nia rekomenda.
Notísia relevante:MESSK hapara atividade klase paralela UNPAZ Oé-cusse
Iha ámbitu ne’e, enkoraja estudante sira atu kontinua aprende no husu mós ba profesór sira atu hanorin kumpre kurríkulu nasionál no labele abandona estudante sira.
“Ne’ebé, husu ba profesór sira hanorin tuir kurríkulu ne’ebé iha, labele abandona estudante sira, tanba ha’u rona informasaun barak, katak UNPAZ iha Oekusi la’o ladun di’ak, tanba ne’e mak hanesan Ministru, ha’u ko’alia ona Reitór UNPAZ, no informa mai ha’u katak, ministériu prepara oráriu atu ba haree klase paralelu Oekusi no Kovalima, ne’e mak ohin ha’u mai vizita, no orientasaun mós husi Primeiru-Ministru,” Governante ne’e rekomenda.
Seidauk prienxe kritériu atu loke polu
Autoridade ne’e hateten, iha tempu-badak tékniku sira husi Ministériu Ensinu Superiór Siénsia no Kultura sei mai rekolla informasaun ba estudante sira no profesór sira kona-ba prosesu aprendizajén klase paralelu UNPAZ Oekusi.
“Ha’u mós sei fó relatóriu ba Primeiru-Ministru katak, UNPAZ laiha ona polu iha Oekusi, maibé iha de’it klase paralelu, ne’e informasaun klaru. Ha’u tenke hato’o tanba Primeiru-Ministru mós rona ona katak Oekusi iha eskola polu, maibé avaliasaun ne’e hatudu katak UNPAZ seidauk prienxe kritériu atu loke polu, maibé tuun fali ba klase paralelu,” nia hateten.
Notísia relevante:UNPAZ husu MESSK reavalia enserramentu kampus ramu iha Oé-Cusse no Covalima
Iha biban ne’e, Sekretáriu Koordenadór Klase Paralelo UNPAZ Oekusi, Januario Colo, rekoñese katak, UNPAZ Oekusi seidauk prienxe kritériu liliu rai no rekursu umanu atu hanorin.
Tuir nia, kritériu lubun mak seidauk prienxe, liliu rai ho dosente atu hanorin tenke mestradu, tanba tuir kritéria ne’ebé mai husi ANAAA katak nível lisensiatura labele fasilita matéria ba ema lisensiatura.
Kritéria daruak, ne’ebé seidauk prienxe mak rai iha inísiu kedas, maibé iha fulan kotuk, ho esforsu Reitór, hola ona rai ida iha bairru Oésono.
“Maibé fiar katak ho kooperasaun entre universidade ho Governu liuhusi Ministériu Ensinu Superiór, sei kontinua nafatin hodi trata asuntu sira-ne’ebé mak liga kritériu nível ensinu superiór nian liliu iha klase paralelu Oekusi nian,” nia hateten.
Notísia relevante:UNPAZ hein lisensa operasionál kampus ramu Oé-cusse no Covalima
Entretantu, totál estudante daudaun ne’e hala’o hela estudu iha UNPAZ Oekusi hamutuk 600 ho totál dosente hamutuk na’in-16, ho matéria aprendizajen iha fakuldade neen mak hanesan Direitu, Ekonomia, Enjeñária, Tékniku Agríkola, Saúde Públika no Siénsia Sosiál Umanu.
Notísia relevante:MESSK konsidera kampus DITKREO nu’udar referénsia ba eskola polu iha territóriu
Jornalista: Abílio Elo Nini
Editór: Rafael Ximenes de A. Belo
