Rekonsiliasaun dalan úniku ne’ebé bele asegura estabilidade no pás

DILI, 19 agostu 2022 (TATOLI)–Eis Falintil, João Miranda “Aluc Descrates”, hateten rekonsiliasaun mak dalan úniku ne’ebé bele asegura estabilidade pás ba nasaun no povu Timor-Leste.
Notísia Relevante: Xanana: inisiativa PR Horta promove rekonsiliasaun atu hametin unidade
“Ba ha’u ne’e rekonsiliasaun importante no dalan úniku ne’ebé ita bele asegura estabilidade no pás, nune’e bele halo progresu ba dezenvolvimentu iha ita-nia rai-laran”, Aluc Descrates hateten ba Agência Tatoli relasiona ho komemorasaun loron konsulta populár ba dala-XXIII ne’ebé foti tema “Ho espiritu loron konsulta populár 30 agostu 1999 mai ita hametin pás no estabilidade ba dezenvolvimentu iha ita-nia rai Timor-Leste”, iha Sentru Konvensaun Dili (CDD, sigla portugés).
Nia hateten, bainhira laiha estabilidade no pás mak sei laiha progresu dezenvolvimentu iha rai-laran.
Polítika rekonsiliasaun ne’e hahú kedas Primeira Governasaun nian, bainhira líder nasionál Kay Rala Xanana Gusmão sai hanesan Prezidente Repúblika, ninia parte hahú halo rekonsiliasaun ne’e hodi asegura estabilidade nune’e bele dezenvolve rai ne’e iha futuru ne’ebé mak di’ak no prósperu.
“Polítika rekonsiliasaun ida-ne’e ho objetivu ida katak ho polítika ida-ne’e mak bele asegura estabilidade, pás iha ita-nia rain no ita halo dezenvolvimentu ba rai no povu ida-ne’e. Entaun tempu ona, ita-nia líder sira tenke konsensu tanba ita ultrapasa impase polítika,” Aluc Descrates hateten.
Tuir nia, rekonsiliasaun la’o kle’ur ona maibé ninia polítika implementasaun ne’e mak ladún efisiénte, tanba iha ema balun sei iha emosaun no tensaun ba akontesimentu kruel liu-liu ba violasaun direitu umanu ne’ebé akontese durante funu iha 1974 to’o 1999 ne’e.
Notísia Relevante: Rekonsiliasaun importante ba povu Timor-Leste
“Ita ko’alia polítika rekonsiliasaun maibé internamente iha ita-nia rai laran ita haree hanesan formál de’it. Se iha rekonsiliasaun tanbasá mak líder hanesan hela de’it no sira laiha konsensu,” nia dehan.
Rekonsiliasaun ne’e presiza, relevante no importante tebes ba Timor-Leste maibé bainhira laiha konsensu entre líder ne’e sei laiha estabilizador pás no progresu dezenvolvimentu.
Husu kona-ba polítika Estadu liuhosi Xefe Estadu, José Ramos Horta, promove no halo rekonsiliasaun entre timoroan iha Timor Osidentál no iha TL, nia dehan, odamatan Timor-Leste nakloke ba sé de’it atu mai fali nia knua, moris fatin karik sira sente hanesan ema Timor no timoroan.
“Tanba, uluk sira ba refujia iha Timor Osidentál la’ós ita mak duni sira bá, sira rasik mak bá no agora sira hakarak fila, odamatan nakloke hela, ita la obriga sira atu fila,” nia dehan.
Tanba ne’e, hanesan veteranu ida, Aluc Descrates apela ba joven timoroan sira no povu hotu-hotu atu mantein pás no estabilidade ho espíritu fraternidade ne’ebé boot.
“Ha’u hanesan veteranu ida husu ba joven sira katak ita tenke ho espiritu no ho nosaun ida katak ita mesak timoroan, oinsá mak ita buka hakuak malu atu pás no estabiliza, nune’e ita hamutuk komemora loron FALINTIL no Konsulta Populár ho estabilidade, pás no armonia,” nia apela.
Notísia Relevante: PR Horta: tempu ona hatudu Timor-Leste nia onestidade kona-ba rekonsiliasaun
Jornalista : Osória Marques
Editór : Cancio Ximenes

